Huramentashon di gabinete Pisas III
Gobernador di Kòrsou, Su Ekselensia Lucille George-Wout, a huramenta e minísternan di Gabinete Pisas III bou di liderato di Prome Minister Pisas, Gabinete Pisas III, awe djaluna mèrdia, 9 di yüni 2025.
Den mes ceremonia, Gobernador a huramenta tambe señor Carlson Manuel komo Minister Plenipotensario.
Durante e okashon aki, Gobernador a tene e siguiente diskurso:
Ekselenshanan, miembronan di Gabinete Pisas III,
11 siman pasá, Promé Minister di gabinete Pisas II i ami mes, a risibí, den e mesun sala aki, práktikamente tur lider polítiko i nan delegashon ku a partisipá na elekshon di 21 di mart, pa un reunion informativo tokante e importansia i nesesidat pa kumpli ku e (Landsverordening Integriteit kandidaat-ministers) Ordenansa Nashonal riba Integridat di Kandidato pa bira Minister.
Na e momentu ei e sala aki tabata yen, mirando ku tur hefe di departamento ku ta hasi investigashon den kuadro di e (Landsverordening) Ordenansa Nashonal aki tabata presente, esta: Prokuradó General, hefe di VDC, hefe di FIU, Landsontvanger i Inspektor di Impuesto i tambe SVB. Nan a duna splikashon tokante e investigashon i a kontestá tur pregunta relevante.
Mi ta kontentu di por yama nan tur bon bini awe trobe na okashon di huramentashon di Gabinete Pisas III. Mi ke gradisí boso tur pa boso trabou rápido i, mas ku tur kos, profundo pa ku e proseso di screening di e ministernan ku awe ta nos dilanti. Tambe mi ke gradisí formador pa su trabou. Al fin i al kabo, ta bou di sú responsabilidat e kandidatonan ta keda proponé na Gobernador pa ser nombrá.
E siman ku a pasa, e tema di screening aki a bini bèk na diferente momentu: ta tarea di Gobernador pa pèrkurá ku ta kumpli na letra i spiritu ku e Ordenansa Nashonal riba Integridat di Kandidato pa bira Minister. Mi kier bolbe enfatisá e importansia di e lei aki. Nos lei, ku tabata úniko den Reino pa hopi tempu, a nase for di eksperensianan (no muchu positivo) ku kuestionnan di integridat. Aruba tambe, pa dos aña kaba, tin un lei paresido na esun di Kòrsou.
Mi ke splika dikon mi ta duna tantu balor na e lei aki: e proseso di screening ta un evaluashon di integridat personal i profeshonal di e ministernan ku lo asumí e diferente posishonnan, i tambe un momentu pa verifiká i evitá ku lo por tin konflikto di interes. Mi ke pone énfasis riba e echo ku e propósito di e lei aki no ta primeramente pa ekskluí kandidatonan pa bira minister. E proseso di screening ta destiná pa determiná si e minister ta apto pa ehersé e funshon sumamente importante i krusial aki den nos sistema demokrátiko. E ordenansa nashonal aki ta un instrumento esensial pa protehá nos estado di derecho i pa stimulá transparensia, integridat i konfiansa di pueblo di Kòrsou den gobernashon públiko.
Kòrsou, komo parti di Reino, tin e deber di kumpli ku normanan di bon gobernashon. Statuut di Reino Ulandes ta determiná den Artíkulo 43 ku e paisnan outónomo den Reino mes ta responsabel pa salbaguardiá derecho i libertatnan humano fundamental, seguridat legal i reglanan di bon gobernashon. Pues esaki ta primeramente reponsabilidat propio di e paisnan outonomo.
Sinembargo e mesun artíkulo 43 aki den Statuut ta bisa, ku Reino ta igualmente responsabel pa garantisá e derecho i libertatnan humano fundamental aki, seguridat legal i reglanan di bon gobernashon. Esei ta nifiká ku si paisnan no kumpli ku nan responsabilidat riba e tereno aki, Reino por tuma medida. I ta netamente esaki, nos, aki na Korsou, mester purba di evitá. Ku e Ordenansa Nashonal aki nos ta mustra ku pais Kòrsou ta tuma su responsabilidat pa bon gobernashon, na serio.
Esaki tabata e motibu tambe, ku na momentu ku mi a aseptá e funshon di Gobernador na 2013, apenas un aña despues ku e Ordenansa Nashonal aki a drenta na vigor, mi tambe a pidi, den konsulta ku e Promé Minister di e tempu ei, Sr. Asjes, pa pasa e mesun proseso di screening. Un proseso pues, di akuerdo ku e Ordenansa Nashonal aki. Esaki ta krea pa mi un laso spesial entre ami komo hefe di gobièrnu i e ministernan entrante.
Awe mi tabatin e honor pa, pa di seis biaha den mi término komo Gobernador di Korsou, huramentá un gabinete, inkluyendo gabinetenan Pisas I, Pisas II i awor gabinete Pisas III.
MinPres, no ta solamente e viktoria di MFK den e elekshon ku a pasa ta loke ta pone preshon riba bo “schouder”, pero tambe e kontinuidat den bo liderazgo. Mi tin konfiansa ku bo lo sá di nabegá gabinete Pisas III através di tur tormenta ku orguyo, dignidat i na bo manera úniko, na bienestar di nos pais. I korda ku Gobernador tei pa e laga su mes keda informa, pa e konseha i si ta nesesario atverti. Esei ta e apoyo ku bo por konta riba dje, semper ku bienestar di pueblo di Korsou na bista.
E aspekto finansiero di e programa di gobernashon den linanan grandi, di gabinete Pisas III, ku titulo “Rumbo pa 2030! Un kompromiso nobo ku pais Kòrsou”, awor ta den proseso di kalkulashon serka Stichting Overheidsaccountantsbureau. Despues di esei, e programa di gobernashon lo keda finalisá i aprobá pa gabinete Pisas III, pa e keda presenta na Parlamentu. Mi ke ekspresá mi speransa i konfiansa ku Gabinete Pisas III lo implementá e programa di gobernashon aki den un manera íntegro, firme i balansá, i ku, manera e título ta bisa, lo kumplí ku su promesanan na nos dushi Kòrsou.
Mi ta deseá boso tur, hopi sabiduria i Bendishon di Dios.
Salú i Biba Korsou.