Un visa ta un outorisashon òf desishon pa temporalmente drenta un pais. Na momentu ku ta otorgá un visa, e persona konserní ta haña un sticker den su pasport òf otro dokumento di biahe bálido.
Na momentu ku e persona konserní ta haña e visa, no tin opheshon kontra entrada di e persona akí den e pais di destinashon. Tin biaha, un visa ta nesesario tambe pa tránsito pa bai un terser pais. Ta importante pa sa ku un visa no semper ta garantisá akseso na un pais. Na momentu di drenta un pais, e persona en kuestion mester kumpli visibelmente tambe ku e rekisitonan di entrada.
Por apliká pa un visa Karibense òf un visa Schengen na Gabinete di Gobernador di Kòrsou.
Residentenan di Kòrsou ku no tin nashonalidat hulandes, den algun kaso mester apliká pa un visa karibense. Por ehèmpel pa biaha pa otro parti karibense di reino hulandes (Boneiru, Aruba, Saba, Sint Eustatius i Sint Maarten).
Visa di 90 dia òf ménos
Na momentu ku ta biaha pa otro parti karibense di reino pa 90 dia òf ménos, den prinsipio un visa karibense pa estadia korto ta nesesario. Esnan ku tin e visa akí, por keda riba e islanan menshoná pa un máksimo di 90 dia (denter di un periodo di 180 dia). Tin algun eksepshon riba e obligashon di visa, ku ta deskribí aki.
Un persona ku ke keda na parti karibense di reino pa mas di 90 dia, mester di un pèrmit di estadia. E persona aki mes no por apliká pa su pèrmit di estadia. E mester di un referensia pa hasi esei, manera por ehèmpel un pareha òf dunadó di trabou. Por tuma kontakto ku outoridat lokal di Aruba, Boneiru, Kòrsou, Saba, Sint Eustatius òf Sint Maarten pa mas informashon tokante e prosedura di solisitut.
Den algun kaso, personanan ku no tin nashonalidat hulandes mester apliká pa un visa pa por drenta paisnan Schengen, inkluyendo Hulanda. Esaki yama un visa Schengen. Hulanda no nesesariamente mester ta e destino prinsipal di e biahero. Por apliká pa un visa Schengen na Gabinete di Gobernador di Kòrsou pa biahe pa e siguiente paisnan: Bèlgika, Estonia, Fransia, Hungria, Islandia, Italia, Lituania, Luxemburg, Noruega, Austria, Portugal, Spaña i Suesia.
Gabinete di Gobernador di Kòrsou solamente ta trata solisitutnan pa e área Schengen di personanan ku tin un pèrmit di estadia ku un balides di por lo ménos tres luna despues di nan regreso pa Kòrsou òf Boneiru.
Visa di 90 dia òf ménos
Personanan ku un visa Schengen pa estadia korto por biaha libremente na Hulanda i otro paisnan Schengen te un máksimo di 90 dia (denter di un periodo di 180 dia).
Personan ku ke keda Hulanda pa mas di 90 dia, posiblemente mester di un visa pa estadia largu. Por ehèmpel si nan mester keda pa trabou, estudio òf pa bai biba serka famia na Hulanda. Tin biaha nan mester di un pèrmit di estadia tambe. Un visa pa estadia largu yama tambe un outorisashon pa estadia provishonal (machtiging tot voorlopig verblijf – mvv). Ta dependé di nashonalidat i e ophetivo di e estadia si un hende mester di un mvv i/òf pèrmit di estadia. Por haña mas informashon tokante di e mvv na e departamento di asuntunan konsular. Servisio di Inmigrashon i Naturalisashon (Immigratie- & Naturalisatiedienst - IND) por duna informashon tokante e pèrmit di estadia na Hulanda.
Visa di tránsito
Personanan ku ke biaha pa un pais no-Schengen via un pais Schengen, tin biaha mester di un asina yamá visa di tránsito. Ta trata di biahenan via Hulanda, Bèlgika, Estonia, Fransia, Hungria, Islandia, Italia, Lituania, Luxemburg, Noruega, Austria, Portugal, Spaña, Suesia òf Suisa. Esnan ku tin visa di tránsito, solamente mag transbordá pa otro avion ku destinashon pafó di e área Schengen. Nan no mag sali di e zona internashonal di aeropuerto. Tampoko pa buska nan ekipahe. Pues e personanan akí no ti akseso na e área Schengen. Si mester, por apliká pa un visa di tránsito na e departamentu di asuntunan konsular.
Ta dependé di e kaso i e situashon si un persona tin obligashon di visa. Meskos ta konta pa e dokumentonan rekerí pa trata e solisitut di visa. P'esei, ta rekomendabel pa tuma kontakto adelantá ku e departamentu di asuntunan konsular. Si resultá ku bèrdat e persona mester di un visa, e mester traha un sita na Gabinete di Gobernador di Kòrsou pa entregá e solisitut.
Despues di a traha un sita, por bishitá e wèpsait akí di Ministerio di Asuntunan Eksterior, pa kuminsá yena e formulario di solisitut pa visa online. E proseso akí ta konsistí di kuater paso:
1. Traha un kuenta (account) dor di skohe e idioma deseá ariba na man drechi riba e wèpsait i despues klek riba ‘traha un kuenta’.
2. Verifiká e kuenta dor di konfirmá e-mail i number di telefòn ku e kódigonan risibí di Gobièrnu di Reino.
3. Yena e formulario di solisitut online.
4. Imprimí e formulario inkluso barcode i trese esakinan dia di e sita.
Nota bon: Durante e periodonan di fakansi i dianan di fiesta, e prosedura di solisitut i tratamentu por tuma mas tempu.
Na 2025*, e gastunan pa un visa ta:
Produkto
Gastu
Visa Karibense
(mucha te 6 aña di edat)
gratis
Visa Karibense
(mucha di 6 te ku 11 aña di edat)
NAfl. 80,-
Visa Karibense
(tarifa normal)
NAfl. 160,-
Visa Schengen
(mucha te 6 aña di edat)
gratis
Visa Schengen
(mucha di 6 te ku 11 aña di edat)
NAfl. 90,-
Visa Schengen (tarifa normal)
NAfl. 180,-
* Anualmente, ta indeksá gastu pa visa.
Kliente por paga ku tarheta na florin antiano (ANG) na Gabinete di Gobernador di Kòrsou.