Tin tres opshon pa optené nashonalidat hulandes: outomátikamente dor di nasementu, dor di rekonosementu òf adopshon (pa lei), dor di opshon òf dor di naturalisashon. Riba e páginanan aki bou por lesa mas tokante tur dos manera pa bira hulandes.
Personanan ku no tin nashonalidat hulandes pa lei, pero ku sí ta deseá di optené esaki, mester apliká pa e nashonalidat hulandes. Por hasi esaki segun dos prosedura: entregando un deklarashon di opshon, òf dor di apliká pa otorgamentu di nashonalidat hulandes. Kua di e proseduranan ta aplikabel, ta dependé di situashon i sirkunstansia personal di e kandidato.
Tin algun diferensia importante entre e prosedura di opshon i esun di naturalisashon
Opshon
Naturalisashon
Tèst di naturalisashon
Rekisito di integrashon no ta aplikabel (no ta hasi tèst di naturalisashon)
E rekisito di integrashon ta aplikabel (a ménos ku, pa motibu médiko, di esfuerso hasí òf basá riba bo edukashon, bo ta bini na remarke pa dispensashon òf eksonerashon kompleto).
Outoridat di desishon
Gobernador ta konfirmá e deklarashon di opshon.
Rei ta disidí pa medio di dekreto real tokante di e aplikashon pa nashonalisashon, riba proposishon di Minister di Hustisia i Seguridat.
Término di desishon
Den kaso di opshon, e término di desishon ta máksimalmente 26 siman.
Den kaso di naturalisashon, e término di desishon ta máksimalmente 12 luna.
Gastu
E gastunan pa tratamentu di e solisitut ta mas abou ku pa tratamentu di naturalisashon.
E gastunan pa tratamentu di e solisitut ta mas haltu ku pa tratamentu di opshon.
Tur esnan ku ta haña nashonalidat hulandes dor di opshon òf naturalisahon mester asistí na un seremonia di naturalisashon denter di un aña despues di e desishon. Durante e seremonia, goberador ta dediká atenshon na e nifikashon di e nashonalidat hulandes. Tambe e ta papia di e balornan fundamental di reino i e derecho i debernan di tur siudadano hulandes. Ademas, gobernador ta papia di e vínkulo entre esnan ku ta haña nashonalidat hulandes i e sosiedat di Kòrsou i di reino.
Durante e seremonia di naturalisashon, e optante òf e persona naturalisá ta huramentá òf deklará i primintí. Despues e ta haña e nashonalidat hulandes ofisialmente. Seis siman despues di e seremonia di naturalisashon, e por akudí na departamentu di Asuntunan Públiko (Kranshi) pa apliká pa un pasport hulandes.
Despues di a optené nashonalidat hulandes, en prinsipio, e optante òf e persona naturalisá mester renunsiá e nashonalidat original. Ya kaba na momentu di entregá un solisitut, ta informá e optante òf e persona ku ke naturalisá tokante di e deber di renunsiá òf laga di renunsiá su nashonalidat original. Nan mester firma un deklarashon di disponibilidat pa esei.
Den e foyeto akí ta duna mas splikashon tokante ki ora ta nesesario pa renunsiá otro nashonalidat.
Tur situashon ta diferente. P'esei, gabinete ta konsehá pa tuma kontakto ku e departamentu di asuntunan konsular. Durante ora di konsulta habrí òf sigun sita, un di e trahadónan konsular por splika kua situashon ta apliká pa e persona den kuestion. Ta indiká kua dokumento ta rekerí pa kada situashon.
Nota bon: tene kuidou ku mediadónan dubioso ku ta entregá dokumento falsu na esnan ku ke optené nashonalidat hulandes. Frekuentemente, nan ta kobra sumamente karu pa nan servisionan.
Por apliká pa opshon òf naturalisashon solamente na gabinete di gobernador. E solisitante semper mester akudí personalmente na gabinete pa hasi esaki. Un intermediadó no por entregá un solisitut pa optené nashonalidat hulandes na nòmber di un otro persona.
Semper tuma kontakto direktamente ku gabinete di gobernador pa haña informashon konfiabel tokante di e proseso di solisitut, e dokumentunan rekerí i e gastunan.
Gastu pa opshon i naturalisashon entrante promé di yanüari 2025*:
Produkto
Gastu
opshon; singular
Cg. 442,-
opshon; kolektivo
Cg. 755,-
opshon; menor di edat ku tambe ta opta
Cg. 48,-
naturalisashon; singular; standart
Cg. 2,086,-
naturalisashon; kolektivo; standart
Cg. 2,663,-
naturalisashon; singular; rebahá**
Cg. 1,551,-
naturalisashon; kolektivo; rebahá**
Cg. 2,130,-
naturalisashon; menor di edat ku tambe ta naturalisá
Cg. 308,-
* Anualmente ta indeksá e gastunan pa solisitut di siudadania hulandes dor di opshon òf naturalisashon.
** Klek e link akí pa lesa den párafo 2.5 den kua kaso e tarifa rebahá pa solisitut di naturalisashon ta aplikabel.
Kliente por paga ku tarheta na florin karibense (XCG) na Gabinete di Gobernador di Kòrsou.
Foyeto
Den nos foyeto 'Kon bo por bira Hulandes? E prosedura na Kòrsou' por lesa mas tokante di ámbos prosedura pa bira hulandes na Kòrsou.
