Gobernador di Kòrsou ta na kabes di Gobièrnu di Kòrsou. E ta representá tambe Gobièrnu di Reino Hulandes na Kòrsou.
Ora ku Gobernador ta ku ferlòf òf si e ta den eksterior, Gobernador interino ta enkargá temporalmente ku su tareanan. Esaki ta e kaso tambe ora Gobernador no por ehersé su funshon temporalmente, òf si e renunsiá promé ku fin di su término di nombramentu.
Su Mahestat Rei ta nombra Gobernador i Gobernador interino pa un Dekreto Real. Tantu pa Gobernador komo pa Gobernador interino, e término di nombramentu ta seis aña. Despues di e periodo akí, Su Mahestat Rei por nombra Gobernador (interino) un biaha mas pa un máksimo di seis aña.