A stipulá e bandera distintivo di Gobernador di Kòrsou pa dekreto real riba 20 di sèptèmber 2010.
Hoge Raad van Adel a duna konseho tokante e diseño di e bandera distintivo. E dekreto real a drenta na vigor riba 10 di òktober 2010. E dia ei, Kòrsou a haña e status di pais outónomo den Reino i e promé Gobernador di Kòrsou a asumí su puesto.
Bandera distintivo di Gobernador di Kòrsou
E dekreto real ta kontené un deskripshon di e bandera distintivo di Gobernador di Kòrsou. E teksto di e dekreto ta:
E bandera distintivodi Gobernador di Kòrsou ta un bandera rektangular, di kua e largura tin un korelashon ku e altura di 3:2, ku na banda ariba i abou tin konsekutivamente un raya kòrá, un raya blanku i un raya blou den e kolónan di e bandera hulandes, tur ku un anchura di un di diesdos parti (1/12) di e bandera. E tres rayanan ariba i esnan di abou ta separá di otro pa un raya blanku, ku un sírkulo meimei di dje ku un diameter di sinku di diesdos parti (5/12) di e altura di e bandera. E sírkulo akí tin un raya blou, hel i blou, ku anchuranan ku ta relashoná ku otro den proporshon 5:1:2 riba e liña medio vertikal. E raya blou ariba ta kargá ku dos strea blanku di sinku punta, riba un liña diagonal, di kua e tamaño di esun chikí ta dos tersio (2/3) di esun grandi. E kolónan den e sírkulo ta e kolónan di e bandera di Kòrsou.
E bandera distintivo di gobernador ta kologá na e fachada dilanti di Kas di Gobernador. Na momentu ku gobernador ta hasi uso di e outo di servisio, su shofùr ta pone un modèl chikí di e bandera riba e outo tambe.
Bandera distintivo di Gobernador di Antia Hulandes (1966-1987)
Di 1966 pa 2010, Gobernador di Antia Hulandes tambe tabata tin su mes bandera distintivo. A stipulá esun promé pa dekreto real (riba 5 di aprel 1966).
A deskribí e bandera di Gobernador di Antia Hulandes (1966-1987) di e siguiente manera:
Un bandera rektangular, di kua e largura tin un korelashon ku e altura di 3:2, ku na banda ariba i abou tin un raya kòrá, un raya blanku i un raya blou den e kolónan di e bandera hulandes, tur ku un anchura di un di diesdos parti di e bandera. E tres rayanan ariba i esnan abou ta separá di otro pa un raya blanku, ku meimei di dje e raya kòrá vertikal i e raya blou horizontal ku e seis streanan di e bandera di Antia Hulandes, di kua e largura di e raya blou i e altura di e raya kòrá ta un tersio di respektivamente e largura i e altura di e bandera.
Bandera distintivo di Gobernador di Antia Hulandes (1987-2010)
E bandera ku a hiba di 1987 pa 2010 tabata kasi idéntiko na e deskripshon anterior. E diferensia ku e bandera di 1966 tabata ku a baha e kantidat di streanan den e bandera te sinku despues ku Aruba a haña un status aparte.
