Promé ku 1954, Kòrsou, ku e dependensianan Aruba, Boneiru, Sint Maarten, Saba i Sint Eustatius, tabata kolonia di Hulanda. E tempunan ei, rei tabata nombra gobernadornan unilateralmente.

Na 1954, e Statüt pa Reino Hulandes a drenta na vigor. Di e manera akí, Antia Hulandes a bira un pais outónomo den reino.

For di e tempu ei, gobernador ta representante di rei i tambe hefe di gobièrnu di e pais. Apesar ku rei ainda ta nombra gobernador pa dekreto real, esaki awor ta sosodé ku konsentimentu di gobièrnu di pais. Nicolaas (Cola) Debrot tabata e promé yu di tera (boneriano) ku a desempeñá e puesto di gobernador pa Antia Hulandes.

Riba promé di yanüari 1986, Aruba a haña "status aparte" i su mes gobernador. Riba 10 di òktober 2010 a disolvé Antia Hulandes; Kòrsou i Sint Maarten a bira paisnan outónomo den reino, miéntras Boneiru, Sint Eustatius i Saba a bira entidatnan públiko di Hulanda. Esaki a marka e final di e puesto di Gobernador di Antia Hulandes. For di e momentu ei, Kòrsou i Sint Maarten tur dos tambe tin nan mes gobernador.