Tareanan

Gobernador ta risibí personanan den oudiensia kasi diariamente. Minister presidènt tin oudiensia ku Gobernador tur siman. E sobrá ministernan ta haña un invitashon kada dos luna. Durante oudiensia, minister ta informá Gobernador di e desaroyonan riba nan tereno di maneho. Ademas, Gobernador ta risibí minister i mandatarionan di otro pais den reino, embahador i kònsùlnan. Representante di organisashon- i empresanan gubernamental, i di organisashonnan di sektor privá tambe ta pasa serka Gobernador pa un oudiensia periódikamente.

Na inisio di nan funshon, diferente funshonario ta ekspresá nan huramentu òf promesa dilanti Gobernador. Esaki ta konta por ehèmpel pa minister, parlamentario, miembro di Konseho di Konsulta (Raad van Advies), miembro di Kontrolaria General (Algemene Rekenkamer), prokurador-general i wes.

Periódikamente, Gobernador di Kòrsou ta reuní ku e Gobernadornan di Aruba i Sint Maarten. E Gobernadornan ta informá otro tokante asuntunan aktual den nan pais. Ademas, nan ta deliberá riba asuntunan den interes di reino. Por lo ménos dos biaha pa aña, Gobernador di Kòrsou, Gobernador di Aruba i Gobernador di Sint Maarten ta konsultá ku e Minister di Asuntunan Interior i Relashonnan den Reino tokante asuntunan di reino.

Vários biaha pa aña, Gabinete di Gobernador di Kòrsou ta organisá un seremonia di naturalisashon. E seremonia akí ta e parti final di un trayekto ekstenso ku ta kondusí na optené nashonalidat hulandes. Durante e seremonia, e hulandesnan nobo ta ekspresá nan huramentu òf promesa dilanti Gobernador.

Riba e di dos djamars di sèptèmber, Gobernador ta habri e aña parlamentario. Durante e reunion solèm akí den parlamento, Gobernador ta ámplia riba e prioridat i plannan mas importante pa gobièrnu den e aña benidero.

Gobernador ta invitá tur Minister di Kòrsou trimestral pa un reunion konhunto. Durante e reunion di Konseho di Minister akí, Gobernador i e ministernan ta deliberá riba tópikonan aktual di interes komun.

Anualmente, Gobernador ta entregá kondekorashon real. Por nominá habitante di Kòrsou ku a emprendé aktividatnan partikularmente meritorio pa komunidat, serka e Komishon di Kondekorashon di Kòrsou. E komishon akí ta duna konseho tokante e nominashonnan. Ku konsentimentu di Konseho di Minister i konseho di Gobernador di Kòrsou, ta remití e konseho akí na Kapítulo pa Òrdu Sivil (Kapittel voor de Civiele Orden) na Den Haag. E kapítulo ta prepará e dekreto real den kua ta otorgá e kondekorashonnan.

Tradishonalmente, ta otorgá e kondekorashonnan real na okashon di e kumpleaño di Su Mahestat Rei, durante e asina yamá Okashon General.

Gobernador ta presidente di Konseho di Konsulta (Raad van Advies). E por yama reunion di Konseho di Konsulta si e ta haña esei nesesario. Si e mes ta presente na un reunion, e ta dirihí e reunion i por duna konseho (voto konsultativo). Maneho diario di Konseho di Konsulta ta den man di visepresidente di Konseho di Konsulta. Gobernador ta deliberá regularmente ku Konseho di Konsulta. 

Riba invitashon òf riba su mes inisiativa, Gobernador ta hasi bishita di trabou na empresa òf instansianan na Kòrsou. E ta laga e empresa òf instansianan inform’é pa haña un bon impreshon di sierto situashon. Tambe Gobernador ta hasi bishita ofisial na otro parti di reino, por ehèmpel pa e selebrashon di dianan di fiesta nashonal manera Dia di Bandera, òf pa presensiá e diskurso di rei durante apertura ofisial di e aña parlamentario na Den Haag. Ademas, Gobernador ta bishitá rei, e ministernan hulandes i e visepresidente di Raad van State na Hulanda frekuentemente.